Den jødiske innvandringa til Noreg er vevd saman med endringar i Europa på 1800-talet. Etter at ”jødeparagrafen” vart fjerna frå Grunnloven i 1851, busette jødar, hovudsakleg frå Aust-Europa, seg i landet. Historia om dei bergenske jødane blir difor til i brytninga mellom europeisk, norsk og lokal historie.

Forfattar Per Kristian Sebak har teke for seg den jødiske historia i Bergen frå 1851 til andre verdskrigens slutt. Som tittelen på boka spelar på, har den jødiske befolkninga i Bergen aldri vore stor, men mangfaldet har likevel vore til stades.

Boka er eit viktig bidrag til den norske historia, gjennom eit lokalhistorisk perspektiv. Som bidrag til litteraturen om dei norske jødane er dette ei viktig bok ein ikkje visste ein hadde sakna før ho kom.

Sjølv om boka hovudsakleg er konsentrert til Bergen, tek forfattaren geografiske avstikkarar til andre stader på Vestlandet, samt Trondheim og Oslo, som hadde større jødisk befolkning enn Bergen.

For lesarar utanfor Vestlandets hovudstad kan nok boka til tider vere for lokalhistorisk orientert. Samstundes er boka leseverdig for alle som er interesserte i historie om andre verdskrigen og jødeutryddinga. Skildringane syner kor dramatisk situasjonen for dei norske jødane var og kor godt organiserte aksjonane mot jødane var under krigen, men gjev også plass til dei som tok motet til seg og hjelpte jødar frå nazismens grep. Slik blir boka interessant, mellom det lokale og det kontinentale.